Pianu Presonis, po aMpI “in Sardigna su colonialismu passat a tressu de is tressas”

(IlMinuto) – Casteddu, 17 mes''e fiàrgiu - Apalas de su Pianu Presonis - chi previdit su fàbbricu de cuatru penitentziàrius nous in Casteddu, Tàtari, Aristanis e Tèmpiu po unu costu de 160millionis de eurus - si cuant scéti "interessus finantziarius e colonialis". Est cantu denunciat cun d-una nota de imprenta su Diretivu natzionali de a Manca pro s’Indipendentzia. "Su colonialismu in Sardigna - afirmat aMpI – passat puru a tressu de is tressas. Sa política carcerària ferrit prusatotu a is giòvanus disimperaus e a is drogaus e su diritu de sa territorialidadi de sa pena benit negau a is 250 sardus disterraus in is galeras italianas". Immoi puru su pianu presonis, cun is traballus donaus - acrarat sa nota - "in apaltu a cuatru sociedadis italianas, de custas tres ("Opere pubbliche spa, Anemone srl, Gia.fi Costruzioni spa") si furiant agiudicadas is fàbbricus po aghilliri a su G8 chi s'iat essi depiu tenni in Madalena. Ariseru e oi puru [...], scideus chi custas 'ditas de fidúcia', comenti funt lamadas de su Guvernu etotu, ant bintu apaltus giai decidius de is capus mannus po donai a papai a sa solita cambarada de furonis profumaus".