"No teneus bisóngiu de spricullitus po sciri chini bocit In Quirra". Fortuna manna po Sa die de sa Vardania, ma nascit su Cumitau in favori de su Poligonu

(IlMinuto) – Casteddu, 16 de su mes''e fiàrgiu - Quirra, Biddeputzi e Santuidu. Funt stetias custas is tre frimmadas de su domínigu aprontau de su Cumitau Sinonucle po pediri sa serradura de su Poligonu de "Capo San Lorenzo" e po donai ancora una borta un'arrespusta a sa dimandha "Chini bocit in Quirra?". Sa diri, cumentzada cun s'assentadura de unu bronzitu nuràgicu "A Vardania de Quirra e de sa Sardigna totu" e de una una statuedda de sa "Madre dell’ucciso" cussa puru nuràgica, est sighia cun d-una frimmadedda in Biddeputzi e  cun su pràngiu a in su satu de Santuidu. A sa cosa furiant presentis cun is bandheras insoru Sardigna Natzione, Irs, Federazione de sa Sinistra e Sinistra Critica, su Cumitau Gettiamo le basi e su Movimentu Cinque Stelle de Beppe Grillo, ma puru su síndhigu Làconi, Paolo Pisu, sa consillera regionali Claudia Zuncheddu, e rapresentantis de àteras fortzas políticas. Su momentu chi est stetiu de prus importu in totu sa diri, est cussu de s'atóbiu de s'apustispràngiu. Pagu prus de 200 personis ant prenu difatis totu s'àula de su Comunu de Santiudu, chistionendi po oras meda de sa "Sindrome de Quirra" e is efetus suus cun militantis e espertus. "In is territórius nostrus - at nau Matteo Floris, rapresentanti de su Cumitau chi in su Sarrabus si batit contra a sa preséntzia de su Poligonu - sa gherra si cumbatit dógnia diri de 50 annus. No teneus bisóngiu de spricullitus profundaus. S'única  impestadura de su logu est po mori de sa basi de Quirra". "Mi fait praxeri chi custa saba siat prena - at sighiu - ma intendu s'arrepentimentu de sèmpiri candu biu ca ddoi est pagu genti de su Sarrabus".

Sa chistioni pratzit a is fortzas políticas: su síndhigu de Foghesu Walter Mura (Partito Democratico) difendit de sèmpiri a sa basi. Su segretàriu regionali de su "Nuovo Psi", Gianfranco Lecca, at povíntzas propostu de fai unu "Cumitau permanenti po sa difesa de su Poligonu".