Mostras: in su Man de Nùgoro s'aparada prus cumpleta d'arti aborìgena australiana

(IlMinuto) - Casteddu, 3 de su mes''e fiàrgiu - "Dreamtime": s'era de is bisus chi in sa mitologia aborìgena precedit a sa creatzioni. At essi custu su títulu de sa mostra chi s'at a tenni de innoi a pagu - s'aparada prus manna dedicada a s'arti aborìgena australiana - chi at a benni aghillia in is aposentus de su Man de Nùgoro. Unu codromíngiu imbusticau a su puntu de essi propostu in duas mostras distintas in períodus de s'annu diversus. Sa primu 'puntada' de "Dreamtime", intitulada "Lo spirito dell’arte aborigena", s'at a podi ammirai de s'11 de su mes''e fiàrgiu a su 1 de su mes''e maju. Sa segundha, aberta a su púbblicu de su 6 de su mes''e maju a su 28 de su mes''e austu, at a tenni comenti títulu "Arcaicità e astrazione. Il linguaggio dell’arte aborigena". Tra is artistas in mostra ddoi ant essi puru nòminis famosus chi funt bessius a foras de is lacanas de s'Australia. Tra custus, Clifford Possum, John e Luke Cummins, Trevor Turbo Brown e Craig Charles. "Su progetu - si ligit in d'una nota - s'avaliri is agiudus istitutzionalis prus importantis de parti italiana e australiana e tenit comenti 'fiantzeri de calidadi' su Koorie Heritage Trust,  organizatzioni uficiali única a livellu internatzionali po s'avaloramentu e s'istudiu de is culturas aborìgenas". "Dreamtime" at a benni acumpangiada de unu catàlogu pubblicau de s'editori Marsilio. Is sàgius de su catàlogu ant essi certificaus po is istudius antopologicus, socialis e culturalis.