Master and Back. Sa dinúntzia de su Cumitau: “Su bandu trigat a bessiri e ddoi est pagu dinai”

(IlMinuto) – Casteddu 23 de su mes''e fiàrgiu - Tocat a pubblicai su bandu intru 'e su mes''e martzu po accabbai s'esperiéntzia de traballu in Sardigna previdia de su Master and Back. Custa est sa primu cosa  chi su Cumitau Master and Back pedit a sa Regioni Sardigna - Presidenti, Assessori de su Traballu e de su Bilànciu e Diretori de s'Agentzia de su Traballu - cun d-una lítera oberta chi custu mangianu est stetia presentada a s'imprenta in d-una cuferéntzia aghillia in sa sedi de sa Cgil chi s'agat in s'arburada Monastir, in Casteddu. Is boxis de su Cumitau, Arianna Onidi e Cristian Congiu, ant denunciau su tardamentu mannu in sa pubblicatzioni de bandu - annunciau po su mes''e totussantus de su 2010 - e ant presentau una fibera de propostas po mellorai su "Back". Su Cumitau pedit chi su bandu chi depit bessiri po s'esperiéntzia de traballu in Sardigna previdat diversus tìtulus po is aziendhas, is entis púbblicus e is universidadis. Is impresas, chi - acrarat su Cumitau - ant fintzas a immoi impitau su "Back" comenti serbatoius de traballadoris senz''e nisciunu costu (senz''e ddus pigai casi mai a fin''e de s' s'esperiéntzia) depint contribbuiri a su progetu ponendi cussus puru dinai 'e busciaca. "Assinuncas - at nau Onidi - su back diventat unu parchegiu po duus annus, cun s'arriscu de finiri a fai fotocópias". A oi funt casi 2.500 is personis chi abetant de accabbai su progetu Master and Back. Su dinai no bastat po totus cussus chi ant a depi fai sa dimandha. Po assegurai a totus s'esperiéntzia de traballu in Sardigna iant a serbiri 60 millionis de eurus in duus annus. In custu momentu ddoi funt  scéti 40 millionis de eurus chi depint bastai fintzas a su 2013, est a nai ca custa cifra depit bastai po totu su progetu: po s'esperiéntzia a foras de sa Sardigna e po cussa chi si depit fai innoi.