Inps: in Buoncammino protestas po sa suspensioni de is pensionis de invalididadi. Caligaris: “Numerosus presoneris no ant arriciu sa lítera”

(IlMinuto) – Casteddu, 21 de su mes''e fiàrgiu - In su presoni casteddaiu de Buoncammino crescint s'apurimentu e is protestas po mori de s'Inps chi nda liau numerosas pensionis de invalidadi de is presoneris. Ddu denunciat cun d-una nota s'assótziu "Socialismo Diritti e Riforme". "S'Inps fait cun craresa una cassa a is invàlidus chi no funt invàlidus, circhendi de recuperai dinai - precisat sa presidenti Maria Grazia Caligaris - e ferrit senz''e cuscéntzia puru a is categorias prus débbilis e chi si agatat mali, genti chi pigat pensionis chi andant de is 250 a is 500 eurus a su mesi, comenti in su casu de is presoneris". Citadinus chi po su prus no ant nemmancu arriciu sa lítera po si presentai a sa vísita de cuntrollu. "Meda de custus - acrarat sa rapresentanti socialista - si funt bius, difatis, liaus is pagus soddus chi pigànt, únicu rédditu, e no ant cumprendiu nudda de cussu chi furiat capitendi, fintzas a candu is volonteris no ant avreguau ca ant essi depiu fai sa vísita de berífica. Sendu in presoni, calencunu senz''e abbitatzioni stàbbili, no at arriciu sa lítera de convocazioni".