Bellomonte tramudau in Catanzaru, aMpI: “Bruno deportau po fèrriri a sa resisténtzia de sa sinistra natzionali”

(IlMinuto) – Casteddu, 1 de su mes''e fiàrgiu - "Un'atu de acanarjadura política aggraviosu e scellerau, chi tenit cometi únicu iscopu cussu de truncai a sa resisténtzia civili e política de sa sinistra natzionali a cumentzai de s'atacu a sa personi de Bruno". Aici su diretivu políticu natzionali de a Manca pro s’Indipendentzia cummentat a sa nova de su trasferimentu de Bruno Bellomonte de Viterbu a su presoni de Sianu, in Calabria, trasferimentu acontéssiu cenàbara passau. "Su presoneri indipendentista Bruno Bellomonte – scririt aMpI – est stetiu torra deportau in su presoni de Catanzaru. A pustis de unu bellu pagheddu de tempus de su cumetzu de su processu no funt ancora craras is acusas fattas a su dirigenti natzionali nostru. Immoi Bruno benit torra deportau in Catanzaru, in su logu geograficu prus atesu de sa terra sua, de is abbogaus, de is afetus. Totu custu fringheddusindi de is leis asuba de sa territorialidadi de sa pena e de is diritus umanus prus elementaris". Ma - concluit a Manca - "sa sinistra natzionali sarda no s'indullit. Is arréxinis nostras funt in su pópulu sardu e de diri in diri s'afortiant sèmpiri de prus e diventant sèmpiri prus importantis comenti si bit de s'atividati política cotidiana chi fadeus tra is traballadoris e in is comunidadis de Sardigna".