Anfiteatru romanu. Sovraintendenza: "Remòviri coberrimentu in linna". Zuncheddu: "Finisamenti Pellegrini si nd'acatat chi est unu monumentu"

(IlMinuto) - Casteddu, 7 de su mes''e fiàrgiu - Su coberrimentu in linna chi imbestit a s'Anfiteatru romanu de Casteddu andat removia. Est cantu at pediu in is diris passadas sa Sovraintendenza po is benis archeológicus a su Comunu de Casteddu. In is diris passadas puru s'assessori de sa Cultura Giorgio Pellegrini iat ai cambiau pensu asuba de sa chistioni, tenendi un'ategiamentu crítigu asuba de su coberrimentu in linna. "Finisamenti s'istoricu de s'arti Pellegrini - cummentat su consilleri comunali de is Rossomori Claudia Zuncheddu - si nd'acatat chi s'anfiteatru romanu de Casteddu est unu monumentu, no est un'arruinali, no est unu sprufundhu e chi is istruturas in linna de prus de dex'annus, funt formendi mufas e creendi degradu. Funt sciusciendi senz''e torrada is scaberas in pedra asuta de su 'bistiri grai' de linna". Funt de sa mentessi opinioni su "Gruppo di intervento giuridico" e is "Amici della Terra". "Abarrat unu mistériu - precisant is duus assótzius ambientalistas - su motivu chi no at fattu ancora removi su coberrimentu e no si cumprendit poita is autoris e is mandadoris de custu sciasciu culturali no siant stetius incastraus a is responsabbilidadis insoru".