Trasportus in Sardigna: 20 millionis de tàglius a serbítzius e traballu. Filt: “Prontus a sa mobilitada”

(IlMinuto) – Casteddu, 13 de su mes''e gennàrgiu - Un'ammeguamentu mannu de is serbítzius bus de s'Arst e de is serbítzius de trasportu urbanu (500milla chilómitrus de mancu a s'annu scéti po su Ctm), sa serradura de su serbítziu ferruviariu fattu de s'ex Fds (a ecetzioni de is ""metropolitanas" de Casteddu e Tàtari) e tàglius a su personali. A cumentzai de su primu de su mes''e martzu custas ant essi, segundu sa Filt Cgil, is cusseguéntzias de su tàgliu de 20 millionis de eurus a su trasportu púbblicu de sa Sardigna previdiu de Finatziaria natzionali 2010. Cun d'una delíbbera de sa fini 'e s'annu (sa 47/65 de su 30 de su mes''e paschixèdda) sa Giunta regionali at difatis prorogau is livellus produtivus de su 2010 scéti po tres mesis e at ammitiu ca su personali at a benni ammenguau. "Scadius is tres mesis - at nau Cappellacci - s'at a depi tenni un'inscenariu nou de is línias de is machinas, vàlidu fintzas a su 2014, in cust'iscenariu ant a podi derivai po is Aziendhas de Trasportu Púbblicu subrapprus de personali". "Seus meda apessamentadus - at nau su segretàriu regionali Filt Alessandro Bianco – e si seus mobilitendi, impari a is àteras organizatzionis sindacalis, po ponni in campu atzionis de scontróriu a is decisionis de sa Giunta regionali, po tutelai a sa cantidadi e a is calidadis de su serbítziu de Trasportu púbblicu de su territoriu e po acastiai a is postus de traballu".