“Sindrome di Quirra”. Sa mozioni: “Datus pubblicaus a tradu. Cappellacci nerat poita”. Irs: “Portaus s’acuntéssia in Europa”

(IlMinuto) – Casteddu, 7 de su mes''e gennàrgiu - Cali funt is arrexonis de su retardu de sa connoscéntzia púbblica de is datus de su Polìgonu Interforze de su "Salto di quirra"? Poita su controllu de s'area esti stetiu fattu cun dex'annus de retardu si castiaus a is dimandhas de chini ddoi bivit, de is famílias de is mortus, de médicus e Cumitaus? Si serrat cun custas duas dimandhas sa mozioni presentada in Consillu regionali - primu firma cussa de Claudia Zuncheddu – e fatta a su presidenti de sa Giunta, a s'assessori de Ambienti e de sa Sanidadi a pustis de is pubblicatas de is datus pigaus in s'area de is veterinàrius de is Asl de Casteddu e Lanusè: su 65% de is pastoris (po 18 pastoris 10) chi traballat ingíriu de 2,7 chilómitru de sa basi - scoviat su monitoraggiu - est corpiu de malis mandiadoris. Númerus chi no lassant dúbbius e chi faint aumentai s'arràbiu de chini denunciat is efetus de sa présentzia militari in s'area. "Po tres pastoris duus funt corpius - scririt Arbeschida sarda – custu est su prétziu de morti chi sa genti nostra depit patiri a profetu de is giogus de gherra de su colonialismu militari italianu e internatzionali". S'Irs de Gavino Sale est prontu a portai sa chistioni in Europa. "Irs - si ligit in d'una nota - at a fai de totu poita ddoi siat un'interventu de parti de s'Unioni Europea chi possat valutai is cunditzionis beras de custu sciàsciu". "In Ogiastra - aciungit su segretàriu regionali de su Prc Gianni Fresu – funt avelenendi, de annus meda, comenti macus, militaris, allevadoris e bestias. Su partidu de sa "Rifondazione Comunista" in Sardigna arremaciat sa necessidadi de ndi liai sa présentzia militari de su territoriu sardu".