Cumitau Sinonucle: una Die de sa vardania contra a is belenus de su Polìgonu de Quirra. Sale (Irs): “Prontus a intrai in sa basi”

(IlMinuto) – Casteddu, 11 de su mes''e gennàrgiu - Sa batalla de su Cumitau Sinonucle andat adhia de su no a s'àtomu in Sardigna. In sa reunioni de sàbudu passau in Aristanis su Cumitau at difatis decidiu de programmai - a pustis de sa fortuna tenta in Teulada in su 10 de su mes''e ledàminis passau - una Die noa de sa vardania chi s'at a tenni in su Polìgonu interfortzas de su "Salto di Quirra", "allarghendi - si ligit in d'una nota - s'area de paricipatzioni puru a sa chistioni de is dannus a s'ambienti e a saludi tentus po mori de s'impitu de su territóriu sardu comenti logu de sa sperimentazioni de armas chi arregallant a s'ambienti uràniu impoveriu, metallus pesantis e àterus belenus chi benint ingurtius de personis e animabis".

Sa "festa fatta po protesta e po si ndi torrai a pigai sa soverania" s'at a tenni in su mes''e fiàrgiu, in d'una data ancora de fissai. In is datus pigaus de is veterinàrius de sa Asl de Casteddu e de Lanusè si bit ca - po 28 pastoris 10 de cussus chi traballant ingíriu de 2,7 chilómitrus de sa basi, si funt pigaus malis mandiadoris -  custus arresurtaus ant fattu movi puru a s'Irs de Gavino Sale, chi torrat a promovi sa mobilitada contra a sa militarizazioni de s'Ogiastra. "Una batalla chi no eus a fai a tradu - at nau Sale in s'assembrea de su movimentu, reunia domínigu in Abbasànta - e chi at a comentzai cun d'un'ultimatum po fai acabbai debressi dógnia sperimentazioni in is  Polìgononus de Quirra. Chi no fessat aici - at precisau - eus a intrai in is basis in milli e prus de milli e esus a spuntai is cannonis insoru cun sa música".