Ddl Gelmini. Corteu nou in Casteddu. Sdel: “Bolleus s’indipendentzia de s’imparamentu sardu”

(IlMinuto) – Casteddu, 1 de su mes''e paschixèdda - Unu corteu partiu de s'àula 1 de sa Falcotadi de Ingenneria po arribbai in sa sedi de su Consillu regionali. In custu modu ariseru a mangianu pagu prus de 300 istudiantis de s'Ateneu casteddaiu ant nau ancora una borta no a sa riforma Gelmini, chi, aprovada in su merì de sa Camera, at a passai torra a s'anàlisi de su Senau. Contra a sa riforma de su Guvernu Berlusconi fueddat puru Sdel. Su grupu de is giòvanus de Sardigna Natzione Indipendentzia denunciat su caràtiri neoliberista de sa riforma, cun s'intrada de is privaus in su Cda, e proponit un'arretzeta indipendentista po torrai a fai bivi s'imparamentu púbblicu in Sardigna. "Est s'ora - si ligit in d'una nota - chi is istudiantis sardus si dongant un'obbietivu craru: s'indipendentzia de s'istrutzioni sarda comenti strumentu po s'indipendentzia política. Su referenti no depit essi prus su Ministeru o su Guvernu ma sa Regioni e asuba de custa tocat a premi poita s'avvalessat de s'artículu 51 de su statutu po pediri una proposta de lei chi arribbit a s'iscopu giai nau asuba".

"S'imparamentu - concluint is giòvanus de Sdel – est su campu primu po si ndi torrai a pigai sa cuscéntzia natzionali sarda, po custu bolleus nai a is istudiantis sardus de cumprendi sa necessidadi de un'imparamentu autónomu comenti basi prus importantis po su fàbbricu de s'indipendentzia".