Contienda Geas: su prefetu precetat a is traballantis. Casula: “Unu de nos est prontu a si nci ghetai”. Sa solidariedadi de sa Fed e de Sc

(IlMinuto) – Casteddu, 10 de su mes''e paschixèdda - No arricint su stipendiu de cuatru mesis, ma ant essi custrintus su própriu a torrai a allichidiri is trenus de sa Sardigna. A pustis de sa paràlisi totali de su sistema ferruviariu fatta in is diris passadas, su prefetu de Casteddu Giuseppe Balsamo at difatis mandau unu decretu de precetatzioni a is 114 traballantis Geas. Traballantis chi de ora in ora funt sèmpiri prus disisperaus. "Nos seus a oi - at nau a IlMinuto Antonio Casula, incarrigau a sa netesa e a sa manutenzioni de is trenus de Tàtari - dipendentis Geas, ma a domu arribbant is bustas paga sbuidas". "Cappellacci e Carta - at sighiu Casula - s'iant refrancau, iant nau ca s'acontéssia at essi stetia sistemada e in veci s'única cosa chi eus arriciu esti stetia una limusinedda. Innoi sa cosa est sèmpiri prus grai e unu traballanti est prontu a si nci ghetai de s'istatzioni. Oi eus a mandai unu telegrammu a s'amministradori de Trenitalia Soprano, poita teneus su dúbbiu chi no connòsciat beni s'acontéssia". A is traballantis Geas est arribbada sa solidariedadi de sa "Federazione della Sinistra" de sa provìntzia Casteddu. "40 diris fait - si ligit in d'una nota de imprenta - su presidenti Cappellacci iat garentiu, ma scéti a fueddus, sa resoluzioni de sa contienda. De cussu momentu no est cambiau nudda. Is trenus funt frimmus e is traballantis funt senz''e stipendiu e senz''e un'ocupatzioni po su tempus benidori. Dimandaus a su presidenti Cappellacci de si torrai a ponni in cuntatu cun s'amministradori delegau Soprano e su diretori regionali de Trenitalia Tola, po frimmai sa strossa chi est blochendi a is Ferruvias in Sardigna. 15 milla passigeris a sa diri no arrennescint a pigai su trenu po crupa de unu sistema malu de gestioni de parti de is coperativas. Unu sistema chi in is annus at fattu scéti unu maceddu sociali". De sa parti de is dipendentis Geas puru Sinistra Critica Sarda. "Est de fora de conca - si ligit in d'una nota fatta connosci de su cumpartu informatzioni de s'organizatzioni anticapitalista - chi su prefetu de Casteddu precetit a is traballantis chi no arricint su stipendiu de cuatru mesis e chi cun arrexoni lotant po otèniri s'arreconnoscimentu de is diritus insoru. Nesciunu custringit in veci a Trenitalia e a Geas a donai a is addetus de sa netesa cantu ddi depint. Cust'atu de su rapresentanti de su Guvernu in Casteddu, su Prefetu, est un'àteru signali chi benit de unu stadu chi, comenti naràt calencunu, est diaderus un'istrumentu de una classi fatta po strecai a s'àtera".