Traballu. Usb. “Rédditu afiantzau po is disimperadus e precàrius”. Cumentzat s’arregorta de is firmas: obbietivu 15milla

(IlMinuto) – Casteddu, 22 de su mes''e totussantus - Est Cumentzàt uficialmenti sa campagna de s'Usb po mandai ainnantis sa proposta de una lei regionali po su rédditu afiantzau. Po arribbai a is 15 milla firmas necessàrias a presentai su provedimentu in Consillu regionali, in is mesis chi benint su sindacau de basi at a aprontai una fibera de assembreas púbblicas in totu sa Sardigna, cun banchixeddus de arregorta firmas comunu po comunu. Sa proposta de lei po "s'istitutzioni de su rédditu afiantzau po s'agiudu contra a su disimpreu e sa precariedadi de su traballu" esti stetia presentada custu mangianu in Casteddu in sa sedi de s'Usb de bia Maddalena. Su testu previdit unu rédditu afiantzau de 10 milla eurus màssimu a s'annu de donai a is disimperadus, a is precàrius o  a is personis chi comentisiollat pigant unu salàriu meda bàsciu. "Sa Sardigna - at acrarau Antonio Satta - tenit unu disimpreu tra is giòvanus de su 44,7 po centu e s'obbietivu de sa lei est cussu de difèndiri chini su traballu no ddu tenit, bolleus concuistai unu diritu chi assegurit a totu custa genti unu pagu de dignitadi umana". Is risorsas, narat s'Usb, ddoi funt e, in s'Unioni europea, scéti su Portogallu e s'Itàlia no tenint una calencuna forma de rédditu afiantzau. "Is 100 millionis de eurus necessàrius a su finantziamentu de sa lei - at nau Satta - podint essi recuberaus desviendi in su rédditu afiantzau una parti de su dinai de sa contienda intradas, impitendi a custu iscopu una parti de su dinai chi est po su traballu e s'ocupatzioni e ammenguendi is stipendius de is consilleris regionalis".

"Cun is isperdítzius de dinai púbblicu de custus últimus annus, po esémpiu 80 millionis de eurus po su G8 - at concludiu s'esponenti Usb - no si podint nai ca is risorsas no ddoi funt". Is diris de is assembreas e de is banchixeddus po s'arregorta de is firmas ant essi pubblicadas in su giassu: www.rdbsardegna.rdbcub.it.