Lota de is pastoris. Mps: “Acórdiu no arrespetau. Prontus a torrai in pratza”. Cia e Coldiretti: “Nesciuna lamada de Cappellacci”

(IlMinuto) – Casteddu, 11 de su mes''e totussantus - Est durau scéti una cida s'arrépiu tra Ugo Cappellacci e su "Movimento Pastori Sardi" de Felice Floris e Fortunato Ladu. "S'acórdiu firmau a s'obbréscida de su 2 de su mes''e totussantus cun su Mps - si ligit in d'una nota pubblicada in su giassu uficiali de su Movimentu - no esti stetiu arrespetau cun s'abbotzu de su Ddl, presentuau custu mangianu (ariseru, ndr) in Consillu Regionali. Si su scritu no at a benni cambiau, Mps at a torrai un'àtera borta in pratza". In signu de protesta sa delegatzioni de Mps, chi ariseru furiat in Casteddu po acastiai a is traballus de su Consillu, at lassau su Palatzu de bia Roma. "Ddoi est - sighit sa nota - meda delusioni e meda arràbbiu tra is pastoris. Is prumissas strecadas de su presidenti Cappellacci funt foras de contu, e no scéti cussas fatta a fueddus, ma puru cussas scritas". In su trastempus sighit puru sa trivérsia tra Coldiretti e Cia e su presidenti de sa Giunta regionali. "Beneus a sciri - scrìnt is duas organizatzionis - cun spantu de essi stetius lamaus a un'atóbiu cun su presidenti Cappellacci previdiu po is 19.00 de oi (ariseru, ndr). Dd'eus scipiu de su giassu de Regioni Sardigna, de is notas de agentzia e de is telegiornalis, ma no s'est arribbada nesciuna dimanda uficiali de atóbiu".