Lota de is pastoris: cenàbara manifestada in sa 131 contra a sa “lei ingànniu”. Floris (Mps): “No si bastàt sa ‘conca’ de Prato”

(IlMinuto) – Casteddu, 24 de su mes''e totussantus - "No s'at a bastai su stresiamentu de s'assessori Ptato. Sa chistioni dda depit afrontai Cappellacci agatendi is risorsas promitias, poita no tenit prus iscusas e at a depi acrarai a is sardus poita est ponendi in genugu unu cumpartu aici importanti po s'economia sarda". Cun custus fueddus su leader de Mps, Felice Floris, annunciat in d'una nota sa frimmada de su caminu mannu de lota de is pastoris sardus de cenàbara chi benit. A pustis de su blocu de is rastréglius de sa Saras de Sarròccu de cida passada, cenàbara a mangianu is allevadoris ant a manifestai in s'istrada statali 131, a s'artesa de su gruxeri po Bolotana. "Sa lei regionali aprovada a pustis de is acórdius sighius a s'ocupatzioni de su Condillu regionali - afirmat Floris - est una bera traitoría de is promissas fattas e firmadas de su presidenti Cappellacci in personi, chi s'at pigau po culu scorriolendi dógnia acórdiu e portendi a s'aprou de s'àula una lei ingànniu a sa faci de is pastoris e de totu su mundu de is massajus".