In Gonnos torrat s'apuntamentu cun sa Sagra de is Obias. In sa XXIV editzioni puru unu cuncursu fotogràficu

(IlMinuto) – Casteddu, 5 de su mes''e totussantus - De su 19 a su 21 de su mes''e totussantus ant essi caboris de sa terra a animai Gonnos. In is aposentus de sa Fiera Mercau is caboris ant a aghilliri sa XXIV editzioni de sa Sagra de is Obias. Tra is novidadis de su 2010, unu cuncursu fotogràficu chi tenit comenti títulu "Ollu e olia de sa bidda mia", obertu a is fotògrafus de calisisiat natzionalidadi chi no funt maistus in fotografia e chi apant fattu dexiot'annus, e sa cumpetitzioni "Sa pratza", chi tenit comenti fini cussu de trasinai sa genti de su logu in sa manifestada atressu de is diversas istradas de sa bidda. Chinisisiat tengat interessu at a depi allestiri is próprius cortilis, strintógius o faciadas cun is trastus antigus o modernus usaus po su cultivu e s'arregorta de is obias e de sa produtzioni de s'ollu. Totu custu fadendi in modu chi - si ligit in d'una nota - "Gonnos si trasformit in d'unu 'museu' de s'obia". Comenti est giai stetiu in is annus passaus no at a mancai su cuncursu "Olive e Olio in vetrina" chi lamat is butegajus de sa bidda, e ddus imbitat a participai allestendi, in is diris de sa Sagra, s'imbirdiera de su própriu negótziu cun ollu, trastus po su manixu suu e dógnia àteru ammàniu chi tengat atinéntzia cun s'ollu e is obias. S'ammistratzioni at a donai unu prémiu a s'imbirdiera prus bella.