Cia e Coldiretti: “No podint pigai po culu is pastoris. Is 2500 eurus po aziendha no ddoi funt”

(IlMinuto) – Casteddu, 8 de su mes''e totussantus - "Sa Regioni trampat asuba de su dinai". Est grai s'acusa chi sa Cia e sa Coldiretti faint a sa Giunta regionali a pustis de s'acórdiu cun su 'Movimento Pastori Sardi' e su patu cun Confagricoltura e Copagri. Is arrexonis de is duas organizatzionis funti stetias ammostadas cenàbara passau in d'una cuferéntzia de imprenta in sa sedi de s'Assessorau regionali de s'"Agricoltura", in Casteddu, ocupau de su 13 de su mes''e ledàminis. "In sa proposta de su presidenti de sa Giunta de sa Regioni Sardigna no ddoi funt - denunciant Coldiretti e Cia - tres cosas importantis: no benit previdiu nesciunu acórdiu asuba de sa definitzioni de su prétziu de su lati, sparessit su dinai chi sa Regioni iat destinau a s'arretiru de su pecorinu romanu, de is 130 millionis de sa proposta totali scéti 10 millionis andant po tres annus in deretura a is pastoris". "Su sensu de responsabbilidadi - concluint is duas organizatzionis - chi est parti de s'istoria nostra no si permitit de acetai chi bengant pigaus po culu is pastoris e is massajus sardus cun d'una proposta chi est meda atesu da cussuchi esti stetiu nau". Segundu Cia e Coldiretti scéti una partixedda de is 16milla aziendhas (una dógnia cuatru) at arriciri 2500 eurus intru sa fin''e s'annu, sinnuncas is pastoris s'ant a depi acuntentai de 600 eurus a dognunu.

"A sa dimanda si is 2500 eurus fessant po totus is aziendhas de is pastoris - narant is duas organiztzionis - ddoi esti stetia sa sminicda de su presidenti Cappellacci 'no apu mai nau custu'. Totus is pastoris funt cumbintus de  arriciri intru su 31/12/2010 is primus 2500 eurus, e immoi est beni chi scipiant chi no est berus".