Attili (Sel) a sa Nuova: “Brigata Sassari in Utieri”. Pcl: “Sa bidda no est militarista”, aMpI: “Sa Sardigna no tenit bisóngiu de casermas”

(IlMinuto) – Casteddu, 8 de su mes''e totussantus - "Nùgoro no bollit sa Brigata, Utieri sì". Custu su títulu de un'artículu pubblicau ariseru de sa Nuova Sardegna. Is fueddus, virguletaus, funt de Antonio Attili, boxi regionali de Sinistra Ecologia e Libertà. Is declaratzionis de su rapresentanti de su movimentu de Nichi Vendola arribbant a pustis de sa manifestada aprontata de A Manca pro s’Indipendentzia contra a su fàbbricu de sa caserma de sa Brigata Sassari in Nùgoro. Sàbudu 30 de su mes''e ledàminis in sa citadi, zona Prato Sardo, ant protestau prus de 200 personis, po nai "Imbezes de trattores pro arare arriban carramardos e cannones e truppas de masellu de addestrare". Po Attili custa est un'arrexoni forti poita "s'investimentu" si stresit de Nùgoro in Utieri. "In Utieri - at nau Attili - una cuntestadura de custu tipu no esti stetia fatta de nemus, antzis meda de sa genti de su logu bit cun praxeri sa preséntzia de is militaris". Sa setzioni de sa bidda de su "Partito comunista dei lavoratori" dda pensat diversamenti. "Utieri no est militarista. Attili - scririt su Pcl - controriat sa sinistra sarda chi est contra a dógn'àteru arrexinamentu de trupas de sa Brigata Sassari in calisisiat logu de sa Sardigna e de su continenti. Attili s'est imbentau custa cosa de foras de conca, s'est imbentau una vocatzioni militarista de sa genti de su logu e si nde scaresciu de is mobilitadas chi si funt tentas in Utieri contra a is bombardamentus in Serbia, in Kossovo e contra a s'aciocada a s'Iraq".

Indignada sa reatzioni de sa sinistra indipendentista de aMpI. "A Manca pro s’Indipendentzia – si ligit in d'una nota de su Diretivu natzionali - at aprontau sa manifestada no poita su progetu de sa caserma est previdiu in Nùgoro, ma poita no agguantaus ca in Sardigna bengant costruias casermas o basis noas". Seus prontus a manifestai puru in Utieri". Po is Gc de Tàtari Attili traixit "is arrexonis de sa sinistra". "Attili - scrirint - no pensat a ammenguai is ispesas militaris chi iant a podi essi impitadas in istrutzioni e sanidadi e no pensat nemmancu a is milla e prus de milla etarus de territoriu sardu chi funt in is manus de is fortzas armadas".