In primu pranu: lota de is pastoris. Su fueddu a is pastoris e a is manifestantis carrigaus de sa politzia. “S’est oberta sa cassa a su bistiri nieddu”

(IlMinuto) – Casteddu, 21 de su mes''e ledàminis - "Manifestu de 20 annus e no iu mai biu fattus comenti cussus de martis. Furiaus manifestendi in paxi. Mi connoscint totus, no seu de seguru una personi arrabbiosa. Parrit ca sa politzia fessat circhendi sa gherra. Ddoi at essi stetiu calencunu 'arrebecu', no ddu pongu in dúbbiu. Ma innoi s'est oberta sa cassa a su bistiri nieddu, a su pastori. Furiu ingunis e apu nau: ma ita seis fadendi?".

Testimónia de Sandro Ibba, pastori de Biddaramosa."In su mangianu furiat stetiu arrepitiu prus de una borta. Pastoris sélius: ingiriai a su palatzu e no fadei bessiri nemus. Custu furiat su cómpitu chi teniant is manifestantis. (Pagu primu de sa càrriga, ndr) furiant bessendi is dipendentis de su Consillu e duncas sa genti s'est acostada a is intradas po sighiri su blocu  […]. A cantu parrit Gargiulo furiat stracu (is politziotus si donànt su càmbiu). Duncas s'aconcada forsis esti stetia cussa de impitai is lacrimogenus e in su própriu tempus de atacai. Funt stetius ghetaus is lacrimogenus e is politziotus a grupus de 30 e de 40 si funt ghetaus asuba de sa genti. Craramenti sa genti chi s'est bia atacada at arregortu calencuna pedra e calencuna ampudda po si difendi. Sa genti s'est stresiada abbia de su portu. In su portu is manifestantis no si podiant certu ghetai in mari. Insaras ant acafau is arreciadas e ant circau de si difendi. S'ant sighiu fintzas a sa Capitaneria de Portu. Is lacrimogenus funti stetius sparaus a artesa de ómini e ant pigau a cropus a chini furiat in terra: pipius, féminas".

Testimónia de Franco Pisanu, militanti de Sardigna Natzione Indipendentzia.

"Ant càrrigau senz''e motivu. Sa genti furiat trancuilla. Is pastoris ant arrespustu a pustis de sa càrriga. Si bolliaus carrigai a is politziotus in bistiri de gherra custu at essi acontèssiu de su mangianu, candu furiaus in medas. Nos furiaus trancuillus, sa manifestada furiat paxiosa comenti sèmpiri. No si faint intrai? No depint bessiri! Ma cun paxi. Naturalmenti una borta cumentzada sa càrriga sa genti s'est furriada. Ma poita s'ant atacau? Poita seus lotendi po is diritus nostrus?".

Testimónia de de unu pastori (Sa fonti preferit abarrai anónima. Apricu de sa norma asuba de su segretu professionali arrecconnotu de s'artículu 2 de sa lei 3 de su mes''e fiàrgiu 1963, n.69).

"S'iant avertiu fintzas de su mangianu. Calencunu politziotu s'iat nau: 'Atentzioni: a nos ant donau s'órdini de carrigai, calisisiat sa chistioni chi si presentit'. […] Is pedras funti stetias ghetadas a pustis de is isparus de is lacrimogenus. Is pastoris si funt bius acafaus e ant arrespustu".

Testimónia de de unu pastori (Sa fonti preferit abarrai anónima. Apricu de sa norma asuba de su segretu professionali arrecconnotu de s'artículu 2 de sa lei 3 de su mes''e fiàrgiu 1963, n.69).