In primu pranu: lota de is pastoris. Sni: “Eus a afrontai cun bos is cropus e is lacrimogenus”

(IlMinuto) – Casteddu, 20 de su mes''e ledàminis - "Fortza pastoris e fortza operàjus, eus afrontai cun bos is cropus e is lacrimogenus, eus a fai biri ca sa Sardigna no est prus cussa de is annus 60-70 e ca in su sentidu de is sardus ant agatau logu e funt nascendi duas categorias noas 's'autoidentificatzioni natzionali e sa soverania', chi ant ponni sèmpiri de prus in luxi ca s'aciocu no est tra sa destra e sa sinistra italianas ma tra una natzioni strecada, in sa cali is sardus si connoscint, e unu stadu chi dda strecat, aintru de su cali si connoscint sèmpiri de mancu". Cun custus fueddus su cordinadori de Sardigna Natzione Bustianu Cumpostu cummentat cantu acontéssiu ariseru a merì in Casteddu ingíriu de is 18.00, candu, a fac''e su Consillu regionali, politzia e carabineris ant carrigau is pastoris de Mps, arribbendi - comenti nau  de diversas testimónias - a sparai lacrimogenus a arteza de ómini. "A is sardus in divisa - concluit Cumpostu a arregordaus ca ferrendi is pastoris ferrint cussus 'e totu, is babbus insoru, is nannais insoru, àterus fillus de sa Sardigna comenti cussus e ca puru po issus funt cabendi in pratza circhendi de fai arrespetai diritus e dignidadi".

In su trastempus is pastoris sighint a ocupai s'assessorau de su Bilànciu de Regioni Sardigna.