In primu pranu: lota de is pastoris. Sinistra Critica Sarda: "De sa Giunta scéti promissas e scontrórius"

(IlMinuto) – Casteddu, 20 de su mes''e ledàminis - "Sinistra Critica Sarda espressat sa màssima solidariedadi a su Mps. Is pastoris, chi ariseu a mangianu ant manifestau paxiosus atressu de is bias de Casteddu, po otèniri ascurtu de s'assembrea de su pópulu sardu funti stetius costrintus a ponni asuta de arrocamentu su palatzu de bia Roma. Aundi funti stetius aghillius de pagu prus de 100 politziotus e carabineris cun in is manus maganellus po ferriri". Est cantu afirmat cun d'una nota su cumpartu informatzionis de s'organizatzioni anticapitalista Sinistra Critica Sarda. "A pustis de is promissas de paperinu fattas in sa metadi de su mes''e cabudanni (e un'odg aprovau de Consillu regionali est abarrau lítera morta) - sighit su comunicau - s'única s'arrespusta chi at scipiu donai un'Esecutivu regionali crubau a su Guvernu natzionali (e a is interessus de is facis antigas chi faint parti de sa Giunta noa) esti stetia cussa fai violéntzia. Agentis chi, comenti narant medas testimónias, ant scutu cun mabesa is manifestantis, arribbendi a sparai lacrimogenus a artesa de ómini".