Presonis Sdr a Napolitano: "Fatzat arrespetai sa Costitutzioni e su diritu a sa saludi de is presoneris chi funt in Sardigna"

(IlMinuto) – Casteddu, 13 de su mes''e ledàminis - "Fueddaus cun fustei po dd'ammostai un'acuntéssia meda grai chi, si no resolvia debressi at a biri annullau su diritu a sa saludi de is citadinus privaus de sa libbertadi chi funt impresonaus in is Istitutus Penitentziàrius de sa Sardigna". Cumentzat cun custus fueddus s'apellu chi is volonteris de s'Assótziu Socialismo Diritti Riforme ant fattu a su Presindenti de sa Repúbbrica Giorgio Napoletano dimandendi "un'interventu autoritativu, po salvai su diritu a sa saludi scritu in sa Costitutzioni". Is volonteris de s'Assótziu presìdia de Maria Grazia Caligaris denunciant is cusseguéntzias de su mancau arricimentu de parti de sa Regioni Sardigna de su Decretu de su Presidenti de su Consillu de is Ministrus de su  primu de su mes''e arbili de su 2008. Decretu chi disciplinat su trasferimentu a su Serbítziu sanitariu natzionali de is istruturas e de is risorsas de sa Sanidadi penitentziària.

"Is cusseguéntzias - precisat s'apellu - funt meda grais. Funti stetius serraus is Centrus Crínicus de Buoncammino e de San Sebastiano, aundi furiant a ricoveru 30 e 10 personis chi staint meda mali. In totus is Istitutus funti stetius ammenguadas is bisitas specificas e prus o mancu abbolias is guàrdias médicas de su mangianu e de su noti. Is presoneris-maladius prus grais ant essi trasferius in is ispidalis, ma biu su númeru mancanti de is Agentis de Politzia Penitentziària at a arrisultai impossíbbili garentiri a totus su piantonamentu".