Informatzioni, aMpI: “Prontus a afrontai dogn’acusa fabbricada contra a nos de comunistas e indipendentistas. Sa chistioni bera est ca a s’Itàlia su traballu políticu nostru no praxit”

(IlMinuto) – Casteddu, 15 de su mes''e ledàminis - "De Angelis: cumpòniri su scontróriu in basi a sa necessidadi de sa colonizatzioni". Est custu su títulu de su documentu de a Manca pro s'Indipendenzia chi cummentat is novas bessias in s'úrtima cida asuba de cussus chi definit "giornalis e telegiornalis regionalistas/italianistas". "Su nòmini de s'organizatzioni política nostra - precisat su Diretivu políticu de aMpI - esti stetiu bogau a pillu po is acontéssias chi ant biu comenti protagonista su magistrau Paolo De Angelis. Connosceus su sennori De Angelis po mori de s'operatzioni de scontróriu políticu de su 2006 lamada Arcadia. Operatzioni chi at biu 10 arrestus e 54 investigaus in s'albéschida de s'11 de su mes''e argiolas, medas de custus, dirigentis, militantis e iscritus a s'organizatzioni nostra". "Su sistema de scontróriu italianu [...] - sighit su Diretivu - atressu is pàginas de is giornalis si fait sciri ca s'est circhendi de collegai diversus scrucullus a títulu de militantis nostrus e si fai sciri ca at obertu inderetura unu scruccullu a càrrigu de s'organizatzioni nostra. Aici su dirigenti nostru (Bruno Bellomonte, ndr), in custu momentu giai asuta de processu, diventat su collegamentu de unu númeru importanti de organizatzionis armadas (npc, oir e br). In pagus fueddus est unu cobertori bonu po totus is pingiadas".

"Abetaus - acrarat su comunicau - sa serradura de is scruccullus a càrrigu nostru e seus prontus a afrontai dogn'acusa fabbricada contra de nos. Imbidaus is italianus a fai rispetai is términus de sa lei insoru e a si lamai a giudítziu in d'unu processu. Ma no cun acusas chi no tenint fundamentu, ma narendi craru e tundu ca sa chistioni manna est su traballu políticu nostru, unu traballu cuncretu fattu diri po diri. Su stadu italianu e s'incarrigau de turnu depint tenni su coràgiu de acrarai su cumbatimentu políticu e de investigai e processai is militantis e s'organizatzioni nostra poita indipendentistas, poita comunistas".