“Eus bintu su cuncursu. Fadeisì traballai!”. Presidiu de is Operadoris sóciu sanitarius a fac”e s’Assessorau de sa Sanidadi

(IlMinuto) – Casteddu, 22 de su mes''e ledàminis - "Eus bintu su cuncursu e teneus su diritu de traballai". Iat a podi essi resumiu cun custa frasi su pensu de is casi 70 Oss (Operadoris sóciu sanitarius) ca ariseru a mangianu ant protestau a fac''e sa sedi de s'assessorau de sa "Sanità" in Casteddu, cun s'agiudu de su sindacau de basi Usb. Sa denúntzia est crara. Is aziendhas sanitarias, in veci chi pigai is bincidoris de is cuncursus, pigant personali de is agentzias interinalis. "Po satisfai a is abbisóngius donaus de s'ausétzia de operadoris - si ligit in d'una nota sindacali de s'Usb - is Aziendhas sanitarias in veci de pigai de is graduatorias, pigant fissu is interinalis e ddis faint fai su traballu de is Oss mancai no siant qualificaus". Traballu in afitu chi, a contus fattus, costat meda de prus a is busciacas de sa Regioni. "Su recursu a su traballu interinali - acrarat difatis su sindacau - Bollit nai a tenni un'ispesa in prus po sa púbblica amministratzioni in d'unu momentu de forti crisi finantziaria. Costus prus mannus: dinai a is agentzias cun in prus s'Iva". Una delegatzioni de is traballantis esti stetia arricia de s'assessori regionali de sa "Sanità" Antonello Liori. A sa fin''e s'atóbiu - concluit sa nota sindacali - is traballantis ant decídiu ca cussu de oi depit essi pigau comenti su primu passu po una lotta chi podit essi meda longa e grai, ma chi depit tenni comenti solutzioni cussa de essi pigaus a tempus indeterminau".