Collettivo Anticapitalista Sardo: "AMpI e Bruno Bellomonte miras de atacus pagu pulius de parti de is 'media'"

(IlMinuto) – Casteddu, 11 de su mes''e ledàminis - "A Manca pro s'Indipendentzia est unu partidu políticu chi traballat asuta de sa luxi de subi po sa soverania e s'indipendentzia de sa Sardigna, e no tenit bisóngiu de fai ingestus cali s'ammustiadura de murus o peus ancora su dannu de domus po tenni s'atentzioni asuba de is próprius atzionis". Cun custus fueddus su Collettivo Anticapitalista Sardo espressat solidariedadi a aMpI "mira in custas oras de atacus pagu pulius de parti de is 'media'"."Nos - si ligit in sa nota scrita de su militanti anticapitalista Salvatore Drago a nòmini de su Colletivu - atacaus s'atu fattu, e agatendi arbitràriu su ponni impari aMpI cun s'atzioni acontéssia, pedeus ca totu bengat portau in sa carrela giusta, senz''e depi, giai de primu, costruiri teoremas ". "Ancora prus arbitràriu - precisat Drago - agataus su ai postu impari cust'atzioni e su cumentzu de su processu a càrrigu de Bruno Bellomonte". "Bruno - acrarat su comunicau - est unu traballanti e sindacalista tentu in presoni in manera ingiusta. Unu presoneri políticu (sic) (segundu cantu afirmau de su pm in sa primu udiéntzia chi s'est tenta su 16 de su mes''e cabudanni in Roma) chi est fadendi una presonia preventiva ingiusta po atus chi issu no at fattu, ma no scèti issu, ca nesciunu de is acusaus at fattu". "Arremaciendi - concluit su Colletivu - sa nostra totali solidariedadi a s'organitzazioni política aMpI, e in su mantessi momentu cundennendi su fattu acuntéssiu, pedeius ca s'ingiusta presonia de Bruno biat sa fini e ca assumancu su Consillu regionali tengat unu scatu de fieresa po dimandai sa territorialidadi de sa pena".