Primu diri de scola de lota. Su 15 cabudanni in Casteddu manifestada de Cgil, Cisl, Cobas, Snals e Gilda contra a is taglius a sa scola púbblica

(IlMinuto) – Casteddu, 10 de su mes''e cabudanni – In Sardigna s'annu iscolaticu 2010/2011 s'at a oberri cun d'una diri de lota. Is sindacaus Flc Cgil de sa Sardigna, Cisl Iscola, Snals, Gilda e Cobas Iscola Sardigna ant lamau po su 15 de su mes''e cabudanni una manifestada a fac''e su Palatzu de sa Regioni in viale Trento, in Casteddu.

"Sa política de sciàsciu de su cumpartu de sa connoscéntzia bófia de su Guvernu in custus últimus annus a is dannus de s'iscola púbblica - si ligit in d'una nota fatta connosci de is sindacaus - est portendi s'iscola isulana a sa morti.

Unu cumpartu fattu de 217milla scientis e istudiantis, 11milla classis e 26milla dipendentis tra maistu e Ata. Is sindacaus acusant puru a sa Diretzioni iscolastica regionali chi - scrirint - "est fadendi is tàglius in mesura prus manna de cantu tocàt a fai, meda de prus de 1700 postus de traballu in mancu in d'un'annu".

S'opositzioni a is tàglius chi bollit sa lei 133 de su 2008 est intrada puru in su Consillu provintziali de Aristanis. Calincuna diri fait is rapresentantis de su Pd in s'assembrea regionali ant presentau un'odg chi "arremaciat sa centralidadi de s'istrutzioni púbblica".