"Narant ca sa De minimis no si possat fai". In Twitter sa direta de Mps de s'atóbiu. In Casteddu is "passus grais" de 5milla pastoris sardus

(IlMinuto) – Casteddu, 14 de su mes''e cabudanni - "Is cosas no andant beni: s'atóbiu est buddiu, narant ca sa De Minimis no si possat fai". Custu s'últimu scritu de s'últimu messagiu pubblicau a is 14.15 in sa pàgina Twitter de su "Movimento dei Pastori Sardi". In su 2010 sa crònaca de s'atóbiu tra Giunta e allevadoris andat in direta in su social network. Custu mangianu is maglietas blu de su Movimentu guidau de Felice Floris ant atravessau is bias de su centru de Casteddu, de sa Fiera fintzas a bia Roma, a fac''e su Consillu regionali. Unu corteu de prus de 5milla personis obertu de 30 óminis a cuaddu e de duus mobentis ammantaus de duus lentzolus cun is iscritas "Cappellacci" e "Prato".
A sa manifestada, chi concluit su camminu de lota de is pastoris sardus po totu s'Ísula cumentzau de sa fin''e su mes''e argiolas, ant pigau parti puru is militantis de aMpI, de Sni, de is Rossomori e de s'Irs. A is 13.00 sa delegatzioni de Mps est intrada in su Palatzu de sa Regioni in bia Roma.Ariseru noti, a is 22.40 su Consillu regionali at aprovau, cun s'astensioni de sa majoria, un'odg presentau de s'opositzioni, chi previdit agiudus De Minimis de 15milla eurus po aziendha.

Po un'ispesa totali chi podit essi avalorada in 220 millionis de eurus de donai intru sa fin''e s'annu. Ma a pagu oras de s'aprovatzioni de s'odg is nuus benit giai a pillu in Twitter. "Narant ca sa De Minimis no si possat fai".