Ctm e Arst. Bianco (Cgil): “Custas is beras càusas de is aumentus”. In Facebook 19milla contra a sa “carestia-billetus”. Manifestada in Casteddu e Aristanis

(IlMinuto) – Casteddu, 6 de su mes''e cabudanni - "Sa càusa bera de s'aumentu de is prétzius de is trasportus urbanus e extraurbanus est in su tàgliu de is trasferimentus a is aziendhas". Est cantu afirmat cun d'una nota su segretàriu regionali de sa Filt Cgil Sandro Bianco, denunciendi tàglius po millionis de eurus. Sa manuvra de assestu regionali 2010 - acrarat Bianco - at difatis istabbiliu tàglius de 16 millionis de eurus a s'assessorau regionali de is "Trasporti". "Cun is aumentus de oi - acrarat su sindacalista - si funt portaus ainnantis cun su traballu po cicai de preni, asuba de is pabas de is citadinus, cantu liau de sa finantziaria a is entis de su territoriu po is annus 2011-2012".

Segundu sa Cgil, in totu su territoriu natzionali, funt difatis previdius tàglius po 2.500 millionis de eurus a is aziendhas de su trasportu púbblicu.

"S'aumentu de is prétzius - arregordat Bianco - at provocau is reatzionis giustas de is istudiantis, de is assótzius de is consumadoris, de is sindacaus. Su cuadru po su tempus benidori - concluit - est simpli e meda malu po is citadinus e is traballadoris. Ant a amenguai is chilómitrus fattus dógn'annu e, po custu, ant essi imminoricaus is serbítzius e is incarrigaus". In su trastempus su grupu Facebook contra a is aumentus de is billetus de su Ctm e de s'Arst at arregortu casi 19milla iscritus e cufirmat is manifestadas previdias po cras.

"At essi - si ligit in d'una nota - una mobilitada de protesta meda manna contra a is aumentus Ctm e Arst. In Casteddu s'apuntamentu est po is 9.00 asuta de is pórcius de su Palatzu de sa Regioni Sardigna. In Aristanis in pratza Roma a is 16.30".