Casteddu calat in pratza po su “Clandestino day”. Fortress Europe: 15.556 mortus in su fundu de su Mediterraneu de su 1998 a oi

(IlMinuto) – Casteddu, 21 de su mes''e cabudanni - Torrai a afirmai is principius de s'artículu 1 de sa Dichiara de is diritus universalis de s'ómini: "Totus is esseris umanus nascint líbberus e agualis in dignidadi e diritus" e nai ancora una borta "Seus totus calndestinus. Nesciunu est clandestinu". Cun custus obbietivus puru Casteddu ant a cabai in pratza cenàbara a merì po su "Clandestino Day", manifestada antirazista promòvia de su giornali "Carta". Su corteu, cun sa participatzioni de medas assótzius, at a cumentzai a is 18.00 in pratza Garibaldi. "Portai froris", narant is aprontadoris a sa fin''e de sa manifestada  "ddus eus a fai imbolai in mari de pratza Darsena", in ammentu de is prus de 15milla personis chi in mari ant agatau sa morti, candu cicànt sa vida".

"Medas personis - di ligit in d'una nota ant agatau sepurtura in su fundu de su Mediterraneu (assumancu 15.556 de su 1998 segundu Fortress Europe) o spaciant is próprius diris in presonis desoladas in is logus aundi benint arrestaus, obbligaus a patiri malus tratamentus. Logus chi no donant seguresas asuba de s'arrespetu de is diritus umanus comenti sa Libia, chi at firmau un'acórdiu cun su guvernu nostru in matéria de immigratzioni, logu custu ca usat is motovedetas (fornias de s'Itàlia) po fai mabi, genti chi no si fait scrùpulu de sparai contra a is presuntas nais de "clandestinus".