"Acuntéssia" Bellomonte. aMpI: "Bollint atacai s'indipendentismu". Irs: "disobbedias is leis e sa Costitutzioni"

(IlMinuto) – Casteddu, 20 de su mes''e cabudanni - "S'únicu beru progetu criminali chi si cuat apabas de sa presonia de Bruno Bellomonte est s'atacu a s'indipendentismu e sa destrossa de A Manca pro s’Indipendentzia". Cun custus fueddus sa Diretzioni natzionali de aMpI cummetat sa primu udiéntzia de su processu a su militanti de sa sinistra indipendentista sarda, cumentzau gióbia passau in Roma.
"Sa primu udiéntzia - osservat sa Diretzioni de A Manca - nonostanti is aspetativas, est durada meda e s'aciocu tra s'acusa e sa difesa si previdit essi grai. Is acusas de su Pm funt craras: prus pagu de dexi personis pigadas a casu bolliant torrai a fundai is Br cun ischedas telefonicas, bufadas in osteria e billeteddus aintru de is mígias".
Puru Irs, firmendi sa mudesa longa, at espressau solidariedadi a Bellomonte po s'obertura de su processu.
"Prus de un'annu de presoni preventivu - si ligit in d'una nota fatta connosci de indipendèntzia Repùbrica de Sardigna – funt giai una cundenna meda grai, po chini no siat stetiu reconotu culpàbili de nesciuna cosa. Ddu est ancora de prus si custa pena benit scontada atesu de domu, senz''e tenni assumancu is seguresas prus elementaris reconotas de is cunvénius internatzionalis a tutela de sa cunditzioni de is presoneris. Sa Costitutzioni italiana e is leis de su stadu italianu 'e totu previdint una fibera de principius e de normas in matéria de presonis e penas de presonia chi in cust'acuntéssia aparessint cun craresa sartadas. S'auguraus ca custu no dipendat de sa positzioni política indipendentista de s'imputau".