"Acuntessia" Bellomonte. In 60 in Roma de sa Sardigna po sa primu udiéntzia de su processu. Abbogau Calia: "Poita si fait aici a timi sa perítzia de is intercetatzionis?"

(IlMinuto) – Casteddu, 17 de su mes''e cabudanni - Unu númeru de telèfonu aintru de una mígia, un'intercetatzioni ambientali, diversus viàgius avatu de pari in Roma. Funt custusas is provas "seguras" po mori de is calis Bruno Bellomonte at giai passau 14 mesis in presoni cun s'acusa de ai participau, aintru de una presunta organizatzioni (is noas Br-Pcc) fatta de adderetura seti personis, a s'apariciu de un'atzioni po "ferrit a s'imperialismu e a is próprius símbulus" in ocasioni de su G8 de Sa Madalèna de su 2009 (a pustis stresiau in s'Aquila).

Seti personis, seti "presoneris políticus" in is fueddus de sa púbblica acusa, contra a is capus de Guvernu de is otu principalis poténtzias capitalisticas mundiallis coratzadas in s'Ísula.

Elementus ca ariseru funti stetius arremaciaus de su p.m. in ocasioni de sa primu udiéntzia. Bruno Bellomonte no afrontat a solu custu processu. Ariseru a mangianu furiant difatis assumancu 60 is personis arribbadas de sa Sardigna po portai sa solidariedadi insoru a su comunista indipendentista de aMpI: unu bellu grupu de militantis de A Manca (sa scuadra indipendentista at aprontau sa trasferta), preséntzias de Sardigna Natzione, de s'Irs, de Su Sindacadu de Sa Natzione Sarda, de su Prc, Sinistra Critica e diversus "canis scapus". Presentis puru is fradis de Bellomonte, de sa Sicilia, e sa pobidda Caterina Tani.

Unu sit in curtzu in Pratza Clodio at precediu s'intrada in s'àula giuditziaria. Diversamenti de is citadinus comunus, cussus "a cuncordiu a Bellomonte" ant depiu abetai - segundu cantu acrarau de su Dirigenti de s'Órdini púbblicu Bova - su cunsensu de su presidenti de sa Corti, Anna Argento, po podi intrai in àula, a pustis de su cúmpudu - riservau scéti a issus - de borsas, portafóglius e àteru.

"Sardigna libera!". Bellomonte est intrau in sa gàbbia de s'àula tzerriendi custus fueddus. De cussu momentu est cumentzau unu càmbiu ammutullonadu de ingestus de incoramentu, púngius serraus e de risus afetuosus tra Bellomonte e is cumpangius e amigus suus.

S'abbogau Simonetta Crisci – chi, cun Gianfranco Sollai, difendit su candidau a síndhigu de aMpI a is últimas eletzionis comunalis de Tàtari - at dimandau su coberamentu de s'hard disk de su computer de Bellomonte comenti elementu de prova. Caterina Calia (chi assistit su presuntu capu de sa presunta organizatzioni, Luigi Fallico) at dimandau una perítzia fonica, chi fatzat currispòndiri identidadis certas a is boxis intercettadas. Is pm si funt opostus a sa dimanda. "Ma poita si fai tantu a timi custa péritzia fonica?", at commentau s'abbogau de Lùvula.

A sa fin''e sa primu udiéntzia - cuncentrada prusatotu asuba de elementus ténnicus-giuridicus - calincunu poliziotu ant impediu a Caterina Tani, sa pobidda de Bellomonte, de s'acostai a s'imbirdi po saludai de acanta su pobiddu. S'udiéntzia chi benit at essi po su 21 de su mes''e cabudanni.