Usb Sardegna: “Trenitalia depit torrai a pigai a Bruno Bellomonte”. Manifestada de aMpI a Roma po s’obertura de su processu

(IlMinuto) – Casteddu, 31 de su mes''e austu - Trenitalia depit torrai a pigai a Bruno Bellomonte, lissentziau in manera ingiusta su 10 de su mes''e maju passau. Est cantu narat cun d'una nota de imprenta su sindacau de basi Usb Sardigna.

"Trenitalia - acrat s'organizatzioni sindacali - at decídiu de ddu lissentziai po s'ausentzia meda longa de su traballu, ausentzia determinada 'scéti de responsabbilidadis chi funt de cuss''e totu'. Aprofitendi de su statu de debbilesa suu dd'at lissentziau mandendiddi una lítera in su presoni de Sianu, nonostanti no siat mai stetiu cundennau, difatis est scéti in abetu de giudítziu". "Comenti sèmpiri acontessit in custas ocasionis - precisat Usb - s'imputau iat a depi essi suspendiu de su serbítziu, e no lissentziau. Addolumannu, ancora una borta, Trenitalia (castia s'acuntéssia de Dante De Angelis) si scarescit ca biveus in d'unu stadu de diritu e ca nesciunu podit essi cundennau prima de su processu".Sa primu udiéntzia de su processu (po àteras informatzionis asuba de s'acuntéssia castia is archívius nostrus, ndr) a su dirigenti de aMpI est in programma su 16 de su mes''e cabudanni in Roma.

Po s'obertura de su processu A Manca e su "Comitato lavoratori pro Bellomonte" ant a manifestai a fac''e su Tribbunali romanu po denunciai ancora una borta s'acuntessia de "giustítzia mala" e de repressioni de s'indipendentismu de sinistra a s'opinioni púbblica.

A Manca pro s’Indipendentzia est aprontendi su viàgiu in traghetu (Terranòa-Civitavecchia e torrada) po su 15 e su 16 de su mes''e cabudanni. Po addiriri a sa cosa e po pigai su billetu telefonai a su númeru 3490573528. Po agiudai economicamenti sa manifestada est possíbbili fai unu versamentu in su contu posta pay 4023600453477236, intestau a Alessandra Ruggiu.