Tàtari-Terranòa: in 15 annus 79 mortus in s'"istrada de sa morti". Su Comitau po sa cuatru corsias: "De Cappellacci scéti fueddus"

(IlMinuto) - Casteddu, 5 de su mes''e austu - "Ca de sa Sardigna a chini no ddoi bivit no ndi ddi frigat nudda si no in is mesis de s'istadi po passai is férias est cosa scipia de sémpiri, nonostanti custu, perou, ddoi esti stetia fidi in su fattu chi s''istrada de sa morti (sa Tàtari-Terranòa, ndr) iat essi stetia finisamenti torrada a fai". Est cantu afirmat cun d'una lítera oberta Roberta Bendinelli, raperesentanti de su "Comitato Pro Strada Sassari Olbia a quattro corsie". De su 1995 funti stetias 79 is ànimas chi ant perdiu sa vida in cuss'istrada, un'istrada istrinta e pagu segura, chi cullegat Tàtari a Terranòa.
In su documentu Bendinelli torrat a costruiri is acuntéssias de is ùltimus annus e puntat su didu asuba de sa "política de is noas" portada ainnantis de su Guvernu e de sa Giunta regionali.
"In su mes''e marzu de su 2010 - si ligit in sa lítera pubblicada in su blog de su Cumitau - su Consillu de is ministrus at aghilliu sa dimanda de Ugo Cappellacci de declarai su stadu de apretu in su territoriu de is provìnzias de Tàtari e de Terranòa-Tèmpiu in acàpiu a is traballus de acónciu de s'istrada statali".
"Su Guvernadori - precisat Bendinelli - at fueddau de sa possibbilidadi de tenni 160 millionis de eurus po aviai is cantieris, cun àterus 470, a cantu narat, in arribbu. Totus discursus bellus, ma is fattus? Funt innoi: in reunioni po sa cosa a pustis de duus mesis, su Cipe at torrau a lassai sa Sardigna senz''e dinai. Seus a su puntu de primu 'e cumenzai".