Pastoria: Cappellacci: "Eus a fai sa parti nostra". Fresu (Prc): "Giunta chi no si movit". A Manca: "Regioni incordonada de su Movimentu"

(IlMinuto) - Casteddu, 30 de su mes''e austu - "Sa pastoria est unu setori importanti e po arrexonis acapiadas a s'economia e po arrexonis acapiadas a sa tradizioni nostra (...). Tenendu sa cuscéntzia de s'apretu mannu de is cosas in custu momentu, sa Giunta est pronta no scéti a fai sa parti sua cun pranus istraordinàrius, ma puru a s'impignai po alligeriai is processus, poita siant prus fàcilis e no biant is sacrificius de una parti scéti in faori de un'àtera, ma puru s'agiudu e s'unioni de parti de totus is atoris de sa filèra".

Est cantu at nau su presidenti de sa Regioni, Ugo Cappellacci, in su cursu de un'atóbiu cun is Coldiretti, chi cenàbara passada ant manifestau a fac''e sa sedi de sa Regioni in viale Trento, in Casteddu, po denunciai sa crisi de su setori de sa pastoria.

Própriu in cussas oras in Monti di Mola si teniat una manifestada meda partecipada de s'Mps, chi po su mes''e cabudanni annunziat un'àtera manifestada in Casteddu. Sa lota de s'Mps at otentu puru sa solidariedadi de aMpI - chi ddoi fiat in Portu Retundu - e su sustegnu de Gianni Fresu, segretariu regionali de su Prc.Po su rapresentanti de Rifondazione sa Giunta Cappellacci est tra is prus importantis responsàbbilis de sa crisi de su setori.

"Cun su ricattu de is industrialis de su setori, in s'inerzia de su Governu regionali - narat Fresu - si bollint custringi is pastoris, ancora una borta, a acetai unu prétziu de su lati chi no bastat nemancu po is costus de produtzioni. Centenas de aziendhas e migliaja de traballantis in d'unu setori strategicu po s'economia nostra funt morri morri e senz''e possibbilidadis de isvilupu.

S'agataus de acordu e faeus nostrus - aclarat su segretariu - is iscopus de su documentu políticu-economicu de s'Mps".

Cun sa manifestada a pagus metrus de Villa Certosa - narat su Direttivu políticu de A Manca - "sa Sardigna bera, cussa depositària de sa cultura popolari, de is baloris de sa comunidadi e de un'economia locali est intrada in sa Sardigna de pràstica italiana chi tenit comenti iscopu cussu de fai diventai arricus is pagus merixeddus de su turismu de lussu e de fai spassiai a is turistas arricus de continenti".

"In d'unu mesi s'Mps - aclarat sa nota de aMpI - at ammostau un' istraordinària abbiléntzia a si movi e a incordonai a sa Regioni, chi, difatis, est s'obiettivu chi benit declarau de su Movimentu".