Istrutzioni: in Sardigna 1.707 postus de traballu de mancu in su 2010/2011. Is precarius de Aristanis: "Sa resisténtzia depit partiri de is iscolas"

(IlMinuto) – Casteddu, 31 de su mes''e austu - "Su lissenziamentu de grupu prus mannu de s'istoria de sa Repúbbrica Italiana" andat ainnantis. In s'annu chi benit, scéti in Sardigna ant essi difatis 1.707, 1.037 maistus e 670 "Ata", is traballantis bogaus de s'iscola púbblica gratzias a sa lei 133 de su 2008. Ddu denunciat cun d'una nota su "Coordinamento precari della Scuola di Oristano". "S'irminorigamentu de is traballantis - si ligit in su documentu - benit fattu atressu de s'aumentu de is scientis po classi, s'irminorigamentu de su tempus aintru de s'iscola, s'abbolitzioni de is concomitantzias in s'iscola elementari e de is oras a disposta in is iscolas medias, sa fusioni de is classis de cuncursu, sa serradura de is iscolas in is comunus prus piticus, s'ai postu a sa marolla su maistu únicu, s'irminorigamentu de is oras de sostegnu e sa raiadura de medas matérias in is iscolas superioris".

Comenti contrariai sa riforma? "Una mobilitada meda manna de is traballantis de s'iscola, de is famílias e de sa sociedadi civili - acrarat su Cordinamentu - est s'únicu modu chi s'abarrat po s'opòniri a su processu chi seus bivendu".

"Sa resisténtzia a sa riforma - acrarat sa nota - andat aprontada primu de totu aintru de is iscolas. Si depeus arrefudai de agiudai s'ocultamentu de is dannus chi si funt fadendi atressu de is tàglius a su traballu, a is classis, a is matérias e a s'orariu aintru de is iscolas nostras".