Gig e Amici della Terra: "No a s'afari edilitziu in sa costera de Teulada". 140milla metrus de ciumentu asuba de 700 ètarus

(IlMinuto) – Casteddu, 27 de su mes''e austu - "Cantu s'est berifichendi is sa costera de Teulada, tra Capo Spartivento, Tuerredda e Malfatano, est diaderus una cosa foras de contu. Ancora in su 2010 sa Sardigna bit massacrau de su ciumentu e de s'antropizazioni unu de is logus prus bellus in nòmini de s'afari e de s'arrogàntzia". Est cantu si denunciat cun d'una nota pubblicada in su blog uficiali de su Gig.

Unu de is tretus mannus e prus santzeru de costera chi s'agatat in su Mediterraneu, 35 chilómitrus de costera sana, est cambiendu faci. Acanta de is arenàrgius de Tueredda est in fàbbricu unu progetu edilitziu turisticu de 140 milla metrus cubus asuba de 700 étarus de costera.
A su progetu at donau su cunsensu, cun cuncórdiu, su Consillu comunali de Teulada. Su 23 de su mes''e martzu passau esti stetia difatis aprovada una delíbbera chi autorizat sa sociedadi immobiliari Sitas a variai "s'impiantu urbanisticu po dd'adeguai a is dimandas de mercau turisticu". Is modíficas a su progetu previdint sa rilocatzioni de 33.500 metrus cubus. Su 25 po centu de is mannàrias no at essi prus destinau a su fàbbricu de albergus, ma de villas.
Is assótzius ambientalistas funt perou frimmus e no s'ant a arrendi a su ciumentu. "Po su 'Gruppo d’Intervento Giuridico' e is 'Amici della Terra' - si ligit in sa nota - est unu beru e própriu óbbligu morali sighiri custa batalla meda difícili po sa salvaguàrdia de una de is costeras prus bellas de su Mediterraneu, unu bell'arrogu de identidadi de sa Sardigna nostra".