Ctm e Arst. Sinistra Critica: "Cun s'aumentu de is prézius sa Giunta atacat a is busciacas de is prus débbilis

(IlMinuto) - Casteddu, 30 de su mes''e austu - "Sa curretzioni parziali de cantu istabbiliu de sa delíbbera de sa Giunta regionali de su 3 de su mes''e austu chi fissat is aumentus de is prézius Arst e Ctm no cambiat sa sustàntzia de is fattus". Est cantu narat cun d'una nota de imprenta Sinistra Critica Sarda. "Sa Giunta Cappellacci - si ligit in d'unu comunicau difúndiu de su movimentu anticapitalista - cun aumentus médius de su 20 po centu (comenti at aclarau s'assessori regionali de is "Trasporti" Liliana Lorettu) guadangiat atachendi ancora una borta a is busciacas de is prus débbilis: Istudiantis, traballantis chi no bivint aundi traballant, disimperaus, precàrius, antzianus e immigraus. Est a nai cussus chi depint pigai ammarolla custus mezus púbbricus, no sèmpiri puntualis. Una Giunta senz''e bregúngia, chi est segura candu fissat is aumentus a pustis de pagus mesis de s'aumentu de is poltronas de su cda de s'Arst, chi funt passadas de tres a cincu".

"No scéti custu - finit Sinistra Critica - poita custu Guvernu, causendi in is fattus, s'impitu de sa màchina contra a s'impitu de is mezus púbbricus, ammostata ancora una borta de no tenni in cunsidériu s'ambienti e sa saludi de chini depit respirai ammarolla is gas de su scàrrigu de su scàrrigu de is màchinas".