Ctm e Arst: sa Giunta regionali fait pagai sa crisi a is utentis. In Facebook in 14milla narant no a sa "carestia de is billetu"

(IlMinuto) – Casteddu, 26 de su mes''e austu - Aumentat in Facebook s'opositzioni a is aumentus de is billetus Ctm e Arst bófia de sa Giunta regionali cun d'una delíbbera aprovada is primus diris de su mes''e austu.

In pagus cidas funt difatis 14.280 is personis chi ant addiriu a su grupu contra a sa "carestia de is billetus" in su famosu social network e in medas funt mandendi a s'Assessorau regionali de is "Trasporti" una email a s'indiritzu trasp.assessore@regione.sardegna.it cun sa scrita: "Deu acotzu s'arregorta de is firmas fatta in Facebook contra a is aumentus de su trasportu púbblicu".

No serbit a nudda nai ca a si pigai is aumentus ant essi prusatotu is istudiàntis, is traballantis chi viagint dógnia diri e is immigraus. Cussus chi funt prus fetus de sa crisi economica.

De su primu de su mes''e cabudanni su billetu de cursa simpli de su Ctm at a aumentai de su 20 po centu: de 1 a 1.20 euru. Cussu chi ballit po totu sa diri at a passai de 2.30 a 3 euro, un'incarimentu de 1.400 de su dinai béciu.

S'abbonamentu Ctm po is istudiantis at a costai 163 eurus, ma at essi meda prus caru a si movi puru cun s'Arst, (chi in su mes''e maju passau, gratzias a una delíbbera de sa Giunta Cappellacci, iat biu portai de tres a cincu is personis de su Cda). S'abbonamentu mensili po is istudiantis de 52 cursas, po si movi in su ràgiu de 10 chilómitrus, at a aumentai de 16 a 28 eurus.