Su tempus benidori de su Karate in gara in Mara. Fortuna po sa manifestada aprontada de Alberto Piludu

(IlMinuto) - Casteddu, 5 de su mes''e argiòlas - Su Karate est giòvanu. Funti stetius difatis prus de 100 is pipius e is piciocus chi si funt torraus a agatai sàbudu 26 de su mes''e làmpadas in su Palazetu de Mara po una diri a s'insigna de s'antiga arti marziali - e sport - de s'ísula de Okinawa, in Giaponi.
Is giòvanus, a pustis de ai participau a su stage de is maistus Alberto Piudu (VII dan) e Alberto Fogu (VI dan), si funt cunfrontaus in sa gara chi at serrau sa stagioni 2009/2010.
Ant cracau su "tatami" de sa bidda in provìnzia de Casteddu is atletas de su Karate Club Kanazawa de Cuartu Sant'Alèni e de su Shotokan Karatedo de Mara (sociedadis aprontadoras), de su Karate club Kanazawa de Deximu Putzu, de is sociedadis casteddaias Forma Karalis, Evergreen Cagliari e Shin Ki Tai Pirri, de su Dojo Kyoshi de Cuartu, de s'Assóziu Arti Marziali de Assèmini e de su Karate Do Ryu de Flumini de Cuartu.
Medas is categoria in gara in is specialidadis de su Kumite (cumbatimentu) e de su Kata (fibera de ténnicas "preordinate"). Tra is bicidoris Simone Cogoni (kumite juniores, singeddus marrone e nieddu), Alessandro Piludu (kata giòvanus, singeddus marrone e nieddu), Jessica Sarritzu (cumbatimentu giòvanus femininu, de su singeddu cabori de aràngiu a cussu marrone) e Simone Mocci (cumbatimentu juniores, de su singeddu grogu a su singeddu bleu).