Sa protesta de is maladius de Sla. Su 15 de su mes''e argiòlas sa manifestada a fac''e s'Assessorau de sa "Sanità"

(IlMinuto) - Casteddu, 6 de su mes''e argiòlas - Is maladius de Sla (Sclerosi laterale amiotrofica) cabant in praza. Gióbia 15 de su mes''e argiòlas, a cumenzai de is 10.30, s'at a tenni difatis una manifestada ainnantis de s'Assessorau de sa "Sanità", in Casteddu.
"Su tempus de is fueddus e de is líteras - scririt su rapresentanti de sa Cummissioni Sla Sardigna - est acabbau, immoi is maladius manifestant in primu persona po otèniri is próprius diritus".
Ant a participai a sa cosa puru is maladius postus mali meda chi - acrarat Usala - "no funt mai bessius de domu a pustis de ai fattu sa 'tracheotomia', bivint grazias a unu respiradori e bollint manifestai totu s'arràbiu e sa delusioni insoru po mori de essi trataus senz''e coru".
Is maladius de Sla dimandant ca s'assessori regionali de sa "Sanità", Antonello Liori, firmit debressi su progettu de assistu fattu de sa Cummissioni regionali Sla chi est prontu de su mes''e gennàrgiu.
"No si cumprendit s'arrexoni de custa resisténzia - acrarat Usala - no ddoi funt costus in prus po su momentu, ma s'ant a tenni medas profetus po is familiaris, chi ant a portai aici asuba de is pabas unu pesu prus lébiu. Si no eus a tenni arrespustas - concluit - eus a puntai a soluzionis pagu bellas chi eus a bolli evitai".