Eolicu. Zuncheddu (Rossomori): "Est de su mes''e marzu chi dimandaus is dimissionis de Cappellacci"

(IlMinuto) - Casteddu, 21 de su mes''e argiòlas - "Giai un'annu fait, in su mes''e argiòlas de su 2009, candu su Presidenti Cappellacci in d'una telefonada cun d'un'amigu de sa crica iat nau ca 's'istrobbu de sa Sardigna furiant is sadrus' nos Rossomori iaus nau ca afidai is sortis de sa Sardigna a Cappellacci furiat comenti 'afidai s'acoliadroxu a is mraxanis' e iaus dimandau is iscusas púbblicas suas".
Est cantu arregordat in d'una nota Claudia Zuncheddu, consilleri regionali e presidenti de is Rossomori.
"In su mes''e marzu de su 2010 - sighit sa sardista de sinistra - in d'una lítera oberta a su presidenti Cappellacci e in is dibbàtidus in àula consiliari, iaus denunciau s'arrogànzia po su modu usau de su Presidenti de sighiri in d'una política chi at licuidau e donau po duus soddus is benis púbblicus - bastat a castiai a s'eolicu e a is àteras energias, bastat a castiai a is complicidadis políticas suas cun is cumpartus de sa 'finàzia ciaciarrada e còmplici cun interessus criminalis e mafiosus arribbaus in Sardigna" - dimandendiddi in cuss'ocasioni is dimissionis".
"Oi - concluit a fac''e una bista istituzionali pagu bella e meda spramosa lamada P3, nos Rossomori no podeus no acozai cun praxeri e cun coerénzia a sa proposta de mozioni de discunfiànzia in is cunfrontus de su Presidenti Cappellacci (...). Is sadrus torrint a decídiri cun libbertadi de su própriu tempus benidori".