Eolicu. Ornella Demuru (Irs): "Su presidenti Cappellacci lassit s'incàrrigu. Sa dignidadi de sa terra nostra esti stetia arregalada"

(IlMinuto) - Casteddu, 19 de su mes''e argiòlas - "Cunsideradas is cusseguénzias sèmpiri prus craras de s'acuntéssia eolicu, est assolutamenti legítimu pretèndiri ca sa Giunta regionali pighit atu de sa própriu cundizioni de mancànzia de dicoru. No s'interessant is isvilupus giudiziarius. Est giai meda penosu depi abetai ca siat sa giustízia italiana a fai luxi e a cunvalidai is dinàmicas malas de sa cosa, chi, po sa realidadi funt asuta de is ogus de totus".
Cun custus fueddus sa segretària nazionali de s'Irs, Ornella Demuru, dimandat is dimissionis de su presidenti de sa Regioni Autónoma de sa Sardigna, Ugo Cappellacci".
Is dimissionis - acrarat Demuru - ant essi "unu signali de responsabbilidadi política e at essi puru su mellus medu po si podi difèndiri in is sedis de cumpeténzia de is acusas chi funt bessendi a pillu. S'at a praxi ca a is mantessis conclusionis possant arribbai puru cussus alleaus de custa majoria de guvernu regionali chi si declarant indipendentistas".
"Irs - precisat sa rapresentanti indipendentista - cundennat politicamenti e moralmenti s'arregalu de sa terra nostra, de is risorsas suas e de sa mantessi dignidadi fatta de chini, comenti su guvernadori Ugo Cappellacci, iat a depi guvernai in nòmini de is interessus colletivus de is sadrus, est a nai de is interessus nazionalis nostrus".