Universidadi de Casteddu. Inchiesta afitus: "Po dexi cuntratus nemmancu unu est legali"

(IlMinuto) – Casteddu, 11 de su mes''e làmpadas - Su 92 po centu de is cuntratus de afitu de is istudiantis universitarius chi benint de foras e funt in afitu in Casteddu no est legali, est a nai ca chistionaus de cuntratus pantuma. Est custu unu de is arrisurtaus prus importantis de s'inchiesta fatta in is ùltimus duus mesis de is "Giovani Comunisti" e de "UniCa 2.0".
"S'inchiesta - si ligit in d'una nota - at interessau pagu prus de milla istudiantis e at donau una mesura prus crara de su fenómenu de is afitus senz''e cuntratu e de is cumércius chi si tragant in is pabas de is istudiantis.
Sa majoria de is istudiantis intervistaus parrit difatis tenni una scassa connoscénzia de is próprius diritus. A cumenzai de sa lei 431 de su 1998 in matéria de cuntratus de afitu po agiudai is istudiantis".
"Su 71,24 po centu de is chistionus tentus cun is istudiantis - precisat s'inchiesta - ammostant ca custus no funt a connoscénzia de sa lei e de su cuntratu-istudiantis".
Ma cantu costat afitai una càmara in Casteddu? Su préziu médiu de una càmara po una persona est de 215,53 eurus mentris po una càmara cun àtera genti sa cifra média cabat a 179,70 eurus. Scéti su 4,59 po centu de is intervistaus declarat de spendi de mancu de 150 eurus a su mesi.