Sa morti de s'operàju de s'Anas Elvio Caredda. Bianco (Cgil): "Is dimandas po sa seguresa in su logu de traballu funt po su prus pagu ascurtadas"

(IlMinuto) – Casteddu, 9 de su mes''e làmpadas - "Ancora un'àtera morti bianca, un'atera sorti lègia, una sorti mortali po mori de su traballu. No scideus cali siant is dinàmicas de cust'àteru sciàsciu mannu, ma dimandaus ancora una borta seguresa a manera chi totus is traballantis pozant, dógnia diri, torrai a domu sanus e salvus". Aici su segretariu de sa Filt Cgil, Alessandro Bianco, cummentat s'incidenti in su logu de su traballu chi ariseru at provocau sa morti de Elvio Caredda.
S'ómini, operàju de s'Anas, impignau in su trallu de netesa in s'istrada statali 198 acanta de Nurri, esti stetiu imbistiu e bociu de unu tratori guidau de unu cullega. Is addetus de s'Anas ant proclamau una diri de isciòpiru (in sa diri de su funerali de Caredda) e ant dimandau de fai debressi un'atóbiu cun is capus mannus de s'aziendha.
"Meda bortas - scririt Bianco - is dimandas de interventu de berífica e de controllu asuba de sa seguresa in is logus de traballu, fattas de is organizionis sindacalis, abarrant aundi funt, senz''e essi ascurtadas, benint po su prus subias cun agguantu pagu cuadu de parti de is organísimus chi depint fai is controllus de seguresa in is logus de su traballu".
"Pedeus - concluit su segretariu de sa Filt Cgil - ca s'Anas berifichit debressi s'apricu legali de is normas in matéria de seguresa in totus is cantieris stradalis, est a nai de cussus gestius in primu persona de s'Anas 'e totu e puru de cussus chi funti stetius donaus in apaltu a is impresas de foras".