Poligonu de Quirra. Cordinamentu No Pisq: "Sa Cumissioni po is analisi ambientalis at a assolvi su stadu"

(IlMinuto) - Casteddu, 22 de su mes''e làmpadas - "No seus sogetus po esperimentus". Cumenzat cun custus fueddus unu documentu fattu connosci in is diris passadas de su Cordinamentu No Pisq ("Poligono Interforze Salto di Quirra") a pagus diris de sa presentada de su relatu de sa Cumissioni po is analisi ambientalis fattas a is atividadis de su Poligonu. Su Cordinamentu no donat nesciuna fidúzia a is datus arregortos.
"Su stadu italianu e is medas istituzionis collegadas - si ligit in su documentu - funt sèmpiri stetius meda bravus a giudicai cussas 'e totu, tantu bravus de arrenèsciri sèmpiri a s'assolvi. Est craru ca is critérius chi ant a presentai no ant a pigai in cunsidériu su tassu de mortalidadi de sa populazioni e ant essi fattus passai comenti assolutamenti in sa norma; is esperimentu ant a sighiri finzas a candu is mortus no ant a diventai unu nùmeru incómodu po essi cuau".
Is esperimentus - denunciat su Cordinamentu - si funt tentus cun su "assensu de is amministrazionis comunalis de is diversus partidus".
Is atividadis chi s'ant a tenni in su Poligonu interforze - si podit ligiri in d'una interrogazione presentada s'annu passau de sa consillera regionali Claudia Zuncheddu - "funt ogetu de protestas meda mannas de parti de sa sociedadi civili, chi ndi denunciat is efetus meda malus asuba de sa saludi púbblica, acapiaus a su pesu de is tramudas geneticas e de is tumoris a su sistema emolinfaticu (leucemias, linfomas, etc.) avreguaus in is biddas chi s'agatant acanta de su poligonu, in particolari in sa frazioni de Quirra".
Comenti ponni fini a is esperimentus? "Totu custu - afirmat su Cordinamentu No Pisq - podit finiri si totus s'arrebbellaus. Si fadeus calincuna cosa po nai no a is basis militaris e a is maistus de sa morti".