Isciòpiru generali: "Federazione della Sinistra" e "Sindacato de sa Natzione Sarda" in praza contra a Tremonti

(IlMinuto) - Casteddu, 24 de làmpadas - Aumentant is acozus a s'isciòpiru generali avisau de sa Cgil po nai no a sa manuvra finanziaria de su Guvernu Berlusconi.
Cras in Casteddu e in totu s'Ísula ant a cabai in praza puru sa "Federazione della Sinistra" (Pdci e Prc) e su "Sindacato de sa Natzione Sarda".
"Teneus cuscénzia ca sa manuvra economica presentada de su guvernu no afrontat sa crisi, ma ansis dd'aggravat, poita ndi liat s'ispesa in is cumpartus púbblicus prus importantis po garentiri sa ripresa e su stadu sociali. Is tàglius a is salàrius, a is pensionis, a s'imparamentu, a s'istudiu totu, a sa cultura e a is serbízius púbblicus prus importantis - scririt su Sindacau narendu a totus de participai a s'isciòpiru - ammanniant ancora de prus sa crisi, scarrighendidda asuba de is prus débbilis e asuba de is amministrazionis de su territoriu chi, po garentiri is serbízius prus importantis, funt obbligadas a aumentai is tassas". "Su guvernu italianu - precisant Gianni Fresu (Prc) e Claudio Giorgi (Pdci) - s'annu passau a pustis de ai salvau is bancas e is capitalis mannus de sa bancarruta, oi, cun argumentus chi trastocant sa realidadi, astesiat asuba de is pabas de is traballantis púbblicus e privaus totu su costu de unu dépidu chi de privau est diventau púbblicu".