Bruno Bellomonte torrau a spediri in Calabria. AMpI: "Àteru abbusu". Gióbia in Tàtari su corteu a un'annu de s'arrestu

(IlMinuto) – Casteddu, 8 de su mes''e làmpadas - "A pustis de ai negau a Bruno Bellomonte su diritu de votu e a pustis de dd'ai negau is arrestus domiciliaris, su stadu italianu sighit a ddu cundennai a su cunfinu, prassi illegali e cuntrària a is própriu leis". Est cantu afirmat cun d'una nota sa Direzioni nazionali de A Manca pro s'Indipendentzia.
"Beneus a sciri scéti oi - sighit sa nota - a pustis de numerosas diris de mudesa aundi nesciunu scidiat aundi fessat stetiu portau su dirigenti nostru, ca Bruno Bellomonte esti torra cunfinau in Catanzau, aundi a custu puntu at a abetai sa data de sa primu udiénzia, est a nai su 16 de su mes''e cabudanni".
Puru contra a cussu chi s'organizazioni comunista e indipendentista definit "àteru abbusu" e po pediri "debressi su spresonamentu de Bruno", A Manca pro s’Indipendentzia at aprontau unu corteu a un'annu giustu giustu de s'arrestu de Bellomonte. Is manifestantis s'ant a agatai, in Tàtari, in sa praza de s'istazioni (18.00).
"Funt inbidaus a participai - concluit sa Direzioni - totus is assózius, is partidus, is movimentus, is síngulus chi pensant ca siat arribbau su momentu de nai basta e de s'arrebbellai a cust'àteru malatratamentu, poita cussu fattu a Bruno Bellomonte est su símbolu de s'opressioni seculari chi bidi su pópulu nostru acacigau, sfrutau, umiliau e privau de sa própriu libbertadi.