"Asuba de sa seguresa no s'abasciat sa conca". A un'annu de sa morti de Melis, Muntoni e Solinas sa Fiom si costituiscit parti civili

(IlMinuto) - Casteddu, 24 de làmpadas - Daniele Melis, Bruno Muntoni e Luigi Solinas. Funt custus in nòminis de is tre operàjus de sa Comesa - dita apaltadora de sa Saras de Sarròccu - chi funt mortus po mori de su traballu su 26 de su mes''e maju de su 2009, atosigaus de s'azotu. A prus de un'annu de s'acuntéssia sa Fiom annunziat sa decisoni de si costituiri parti civili in su processu chi at a acrarai is càusas e is responsabbilidadis de cantu est acontessiu in Sarròccu.
"Su 26 de su mes''e maju - afirmat su segretàriu generali de sa Fiom Sardigna Mario Carboni - est una data chi signat una cumparzidura sica poita asuba de sa seguresa in su traballu no s'abasciat sa conca. No si podit donai nesciuna giustificazioni, nesciuna arrexoni candu cuntessint fatus comenti cussus de Sarròccu".
A capu de sa Fiom sadra de su 2 de su mes''e marzu, Carboni dimandat giustízia e tempus no meda longus po su processu. "Sa seguresa in su traballu depit sèmpiri abarrai sa primu cosa - sighit sa nota - in sa Saras comenti in totus is aziendhas. Po cust'arrexoni is metalmecànicus funt portendi ainnatis una batalla culturali aintru de is fàbbricas, impari a is operàjus, e unu cunfrontu cun is meris, cun d'un'atenzioni manna a su cumpartu de is apaltus, a arriscu po mori de is ribbàscius de is garas".