Acórdiu asuba de su traballu tra Cappellacci e Cgil, Cisl e Uil. Usb Sardigna: "Cumediedda de pagu contu de bendidoris de fumu"

(IlMinuto) - Casteddu, 25 de su mes''e làmpadas - Scéti e scéti "una cumediedda de pagu contu". Est custu su giudíziu de su sindacau de basi Usb/Rdb Sardigna asuba de s'acórdiu po is políticas de isvilupu e traballu firmau su 2 de su mes''e làmpadas passau de su presidenti de sa Regioni Ugo Cappellacci e de is segretàrius de su "diàlogu" - firmau a duas cidas de s'isciòpiru generali - chi po s'Unioni sindacali de Basi est fillu de una "classi política e sindacali chi no scit programai su crescimentu e s'isvilupu".
"No cumprendeus - si ligit in d'una nota - su sensu de cust'acórdiu, chi nudda portat in s'iscena política e sindacali in matéria de isvilupu, de ispesas noas, de risorsas, de obbietivus".
Po su sindacau de basi s'acórdiu tra is organizazionis confederalis e Cappellacci no at a portai nudda de bellu po is sadrus. "Sa política regionali - precisat Usb Sardigna - agatat acozu in s'azioni sua fatta cun s'apógiu e s'acórdiu de is organizazionis sindacalis, e a su contràriu, is organizazionis sindacalis concuistant su palcu de is "media" 'fadendi biri ca funt traballendi a sa chistioni' impari a sa política, po sboddicai is chistionis regionalis".
"Ma pensaus - concluit sa nota de su sindacau de basi - ca de unu trambullu aici mannu no pozat nascit nudda, funt bendendi fumu. Seus segurus, e s'eus a bolli sbagliai cun praxeri, ca is nùmerus de s'economia chi chistionant de su stadu de saludi regionali no ant a mellorai in is annus chi benint. Chini at a pagai su contu at essi ancora una borta su pópulu sadru".