Zuncheddu (Rossomori): "Cappellacci brazu fideli de órdinis scapiaus e atesu de is interessus de is sadrus. Lassit s'incàrrigu"

(IlMinuto) – Casteddu, 20 de su mes''e maju - "Su Presidenti Cappellacci at cumprovau de no tenni nesciuna autonomia política e de essi unu brazu fideli de órdinis scapiaus e atesu de is interessus de is sadrus, manifestendi cun craresa atenzioni manna a operazionis políticu-finanziarias cun sa cumpraxénzia de personàgius, po cantu si bit, acapiaus a ambientis economicus pagu bellus". Est custu su giudíziu de Claudia Zuncheddu, consilleri regionali e presidenti de is Rossomori, po sa chistioni de s'inchiesta - chi bidit spreculitau Ugo Cappellacci - de sa procura de Roma po is apaltus de s'eolicu. Sa sardista de sinistra pedit is dimissionis de su Presidenti de sa Regioni Sardigna (e de is capus mannus de s'Arpas de s'Autoridadi de su territoriu).
"Cun is ùltimas acuntéssias parrit chi siant stetius lamaus in càusa puru àterus esponentis de sa Giunta e de sa majoria sua - precisat Zuncheddu -, su Presidenti s'est invalidau a solu, cun su fallimentu políticu in difesa de is interessus de is sadrus".
"Po su grajori de cust'atu - acrarat sa presidenti de is Rossomori - pedeus debressi a su Presidenti de si presentai in Consillu (...) ponendi in s'odg is próprius dimissionis e cussas de is capus mannus de totu is aparatus amministrativus istituzionalis de sa Regioni chi funt protagonistas de custas ùltimas istorias".
"Sa Regioni Sardigna - concluit Zuncheddu - no si podit permiti amministradoris e funzionarius de entis chi funt protagonistas in cosas ambíguas e 'pagu pulias'".